ميسر السردية تكتب : فرفر شعيرة

مرة بحضر بحلقة من مسلسل مرايا، الحلقة كلها عن فريق كرة قدم،كل الفريق بيشتغلوا بوظائف متواضعة، بيروحوا من الشغل العصريات، بياكلوا سندويشات فلافل وببلشوا تدريب بالملعب، بيدربهم ياسر العظمة، بقولهم بتركض من هون من هون وبتاخد الطابة وبتمرر لزميلك وتكمل ، بنط عابد فهد وبيسأله طيب كابتن بعد ماناخد الطالبة نهجم؟ بيرد عليه الكابتن ولك احنا هلأ يادوب قادرين ندافع… وع نفس السيرة بالأردن قطعنا بعض مع مين واقفين بحرب أوكرانيا، وتحليلات واعتراضات حتى في مطالبات لتغيير بنية مجلس الأمن واحنا يا حسرتي كذا مليون ما مُنا ع الحكومة ماتغير التوقيت وتعطينا عطوة بس شهر زمان.. ولا ماترفع المحروقات بالشتوية، لحد هسه مش عارفين شو قصة وكولسات فاتورة الكهربا، ولا ين راحت قنينة النفط اللي اهدتها الوزيرة للرئيس، ولا نرجع دعم الخبز، الخ الخ الخ…بكل قصة بالعالم بنصير فرفر شعيرة ، المشكلة انو بالنهاية العالم المتحاربة بتتصالح واحنا بنظل متلصمين عبعض، ياحسرة ع جوز نصرة…ياالله معلش بنفش غلنا شوي بالدنيا. .. !!