علاء الذيب يروي قصة عن حاكم إداري و"متسول"

تالياً "قصة" نشرها الصحفي علاء الذيب عبر صفحته على الفيسبوك، سرد فيها تفاصيل ما جرى بين حاكم إداري و"متسول"، وكان شاهداً عليها.

نترككم مع التفاصيل :

اسمعوا هاي القصة..

المركز الأمني بحول شخص متهم "بالتسول" لمتصرف الهاشمية مالك بيك كريشان ، ولما انعرض عليه ، سأله المتصرف انت كنت بتتسول !

قله اه سيدي أنا كنت بشحد ما كنت بتسول ، قله ليش ؟

قله يا سيدي عندي اربع اطفال ،اشي بده حليب واشي بده فوط واكل بالبيت ما في ،وما حدا راضي يشغلني !!

قله ما عندك اشي بالبيت ،قله أقسم بالله لو في بالبيت بنص دينار خبز ما طلعت عالشارع .

هون المتصرف قام من ورا مكتبه وأعطاه مبلغ مالي من جيبته،وحكى مع السايق تلفون قله روح جيبلي طرد غذائي محرز ، وحكى مع مدير مصنع الحديد وشغله براتب كويس.

تخيلوا كان بإمكانه يسجنه ويحطه بالسجن ، وفي برقبته اربع اطفال صغار ، بس لما يكون الحاكم الإداري بخاف الله ،وبعرف أنه وضع الناس صعب ،بتصرف بانسانيته مش بمنصبه .

قدر يأمنه بلي محتاجه ،وفوق هيك شغله ، وكسب اجر فيه ليوم الدين..

طبعا انا قاعد عالموضوع من أوله لاخره ،وطلب مني ما انشر اي اشي عن الموضوع في وقتها ،بس الان وبعد سنوات طويلة ،حبيت انشر الموضوع ، عشان تكون رسالة للجميع ، بتقدر تمارس دورك الإنساني وبتقدر تمارس دورك السلطوي ، وبالنهاية أما بندعالك أو بندعى عليك..

علاء الذيب