ميسر السردية تكتب : لغة

من أول ما بلشت الحرب الروسية الأوكرانية بحاول كل يوم احضر نشرة أخبار على محطة Rt بالعربية, لفت انتباهي انه كل ما بيعملوا لقاء مع مسؤول او مواطن في المناطق المحررة الكل يبادر بالقول انهم - الأوكران- يمنعوننا من التحدث بالغة الروسية، إنها لغتنا ونريد التحدث بها.
في ذات الوقت كنت أقارن حالات بتابعها على التلفزيونات العربية وحتى في الحياة اليومية، بشوف كثير من الفنانين وغيرهم من ضيوف البرامج بيحاولوا التعبير عن بعض الحالات باللغة الأنجليزية وكأنه مش قادر يلاقي مصطلح عربي فصيح او عامي يعبر فيه عن نفسه او عن شو بيحكي.
مبارح في محل خضار بحارتنا وسكان حارتنا من الطبقة المتأرجة ما بين حافة الفقر وأطراف الطبقة الوسطى المتأكلة، اصلا حتى صاحب المحل ما بيوفر إلا الخضرة التي لا غرابة في اصنافها يعني يادوب شوية فواكة تقليدية وشوية شغل طبخ.. المهم لفت انتباهي سيدة مبينه من جماعتنا.. وهل يخفى القمر.. كانت بين كل كلمة وكلمة عربي تحكي مع العيل انجليزي وهو برد عليها وبسولف بلهجتنا كمان.، طبعا هاي الحالة صادفتها وعايشتها حتى في بعض الطبقات.. فكرت يا ترى لو لا سمح الله إجانا احتلال مباشر وفرض علينا لغته معقول نتصدي ونتمسك بالعربية.
لما كان حدا يلوق لسانه بالحكي وجدي ما بتفهم عليه كانت بتقوله ملعون ابو قملك قمل.