سامية المراشدة تكتب: حكي قروي : هذا الجو شو بده؟

هذا الجو بده فروة القديمة من فروات الصوف غنم الثقيلة من التي كانت تستورد من سوريا خاصة من مدينة حماة ، وليست من صنع الصين المنتشرة الان في الاسواق ،مع شماغ احمر تتلصم فيه أو يلف على الوجه ما يبين فيه غير عيونك ،هذه الأجواء بدها أن تجلس أمام موقد حطب وجمرة نار تنسيك انك في المربعانية ،تتأمل اللهب والجمر، تغنيك عن صوبة فيها شعلة تشتغل على الغاز ،او حتى صوبة معيرة على كمية الكاز، هذه الأجواء بدها عرس وفرحة فيها دبكة حماسية و مجوز ما يخليك تقعد ،يحمى دمك ويحرك عظمك ، بدل ما الجلوس لساعات طويلة بدون حركة ،هذه الأجواء بدها طبخة ثقيلة معيرة على الدسم والسمن ،هذه الأجواء بدها خبر يسر خاطرك يرفع حرارتك مثل رفعة راتب أو إعفاء من المخالفات السير أو ترخيص السيارة ،او هدية من الحكومة كما يقال ،او حتى إجازة عطلة مفاجأة ،هذه الأجواء بدها ما تفكر بفاتورة الكهربا ويذكرك بالقيزر والمي الباردة ،وتتمتع بمياه سخنه ليل نهار ، هذه الأجواء بدها مضلة وتمشي بشارع بدون طرطشة سيارات ،هذه الأجواء ما بدها تسمع أخبار وحروب ، ولا تشوف افلام رعب وخوف، بدك بس تبعد عن المصروفات التي تقلقك و تذكرك شوفي بجيبتك ، وتبقى المهمة الصعبة أمامك كيف تدفي قلبك واهل بيتك ، هذه الأجواء بدها لمة عيلة ويكون هناك تعاون ،لما تقول للأولاد تعالوا اسهروا معي، الكل يرد عليك و يلتموا حولك على كاسة شاي على الميرامية ،حتى يخففوا عليك مصروف الصوبات ، شفنا ما هو طموح المواطن ... الله يعين