ميسر السردية تكتب :دردشة مع أم عاطف

لما نصحى من النوم يكون ترامب بسابع نومة، مع ذلك شاغلنا وهو نايم وهو صاحي، أول شيء قبل ما أصبح حدا ، أنبش في الأخبار البايتة، شو آخر تصريح للبرتقالي واحنا نايمين؟ في حرب ولا ما فيش؟ مش خوف من الموت بسبب حرب، وعلى رأي جدي الله يرحمه، كان يقول" اللي بيموت وما بيلاقي قدامه حدا أحسن منه، يرجع" ... لحد هسه الجو خادّ، مش مبين في حرب على إيران...

بس برضو الفار بيلعب بعُبي. طيب، إذا طحش القبضاي وضم جرينلاند، وكبرت العركة مع أوروبا.. معقول ترتفع الأسعار؟! ليش لأ؟! كله مع الجوز جايز.. أكمنو الحكومة جوزنا الشرعي والمرعي... بخاف ترتفع الأسعار، مش أسعار الشوكولاتة وأدوات الترف وكماليات الحياة. معلش، إذا ولا بد، يرفعوا أسعار الرموش والأظافر والمناكير، والنبيذ الفرنسي... بس رجاء لا يقربوا على ما رضينا به من ضروريات الاستمرار، زيت وسكر ورز وعدس مجروش... فكرك برفعوها ع وجه رمضان ..؟!!