علاء الذيب يكتب : عن الإضراب .. خلينا نحكي الصح

تحياتي .. الإضراب الأول كان صوته عالي وناس كتير شاركت فيه، بس هالمرة المشاركة كانت ضعيفة جدا، والأسباب بصراحة كثيرة.

هسا يمكن كلامي يزعل جماعة التدخل السريع والصفحات اللي فجأة بتتحمس وبتصير تحكي "ليش ساكت؟ احكي!"... طيب  خلينا نحكي الصح.

الموضوع مش إنه إذا ما شاركت بالإضراب يعني إنك خاين وبايع قضيتك، وربنا راح يحاسبك يوم القيامة زي ما بنشوف بالتعليقات اللي بتصير توزع الذنوب عالناس يمين وشمال.

بالآخر، في ناس شايفة الإضراب وسيلة ضغط، وفي ناس شايفينه مش مؤثر، حتى بفلسطين نفسها نسبة المشاركة فيها ما وصلت ٢٠٪، فمش طبيعي نظل نوزع تهم الخيانة على كل واحد مش عاجبه الوضع.

وبيني وبينكم، أي حدا بكون ديكتاتوري وما بقبل أي رأي غير رأيه، ما بقدر أؤمن فيه، يعني الناس اللي قاعدة بتموت بغزة من أطفال ونساء ورجال، الله يرحمهم جميعا، وبيجي واحد كبير بالعمر وبحكي "ما بدنا حماس"، بتقوم عليه الدنيا، وبتبلش الاتهامات "خاين، بايع دينه، مندس، عميل".

بس اللي عايش تحت القصف والدمار، وفاقد أهله وبيته، من حقه يحكي، حتى لو كلامه مش عاجبك، لما تكون قاعد بأمان وبتفتي من ورا الشاشة وصحن المهلبية بإيدك غير لما يكون بيتك مدمر وفش مكان تنام فيه..

يعني زي ما في ناس بتحب حماس وشايفه اللي بتعمله صح، في ناس شايفه العكس، وبتقول إنه ١٠٠ ألف شهيد، ومليون نازح، و٩٠٪ من البيوت مدمرة مقابل ألف أسير يتم الإفراج عنهم،  ممكن يكون قرار مش صح وتكتيك غلط.

يعني خلونا نهدى شوي، ونبطل نوزع تهم عالناس، أهل غزة أدرى بحالهم، وإلهم الحق يعبروا، وإلهم الحق يتمسكوا بأرضهم، وإنتوا يا جماعة التعليقات اللي بتفاوضوا وبتتفلسفوا عالدم، خفوا شوي، اللي ايده جوا المي مش زي اللي قاعد بعد الصواريخ.

وسلامتكم..