علاء الذيب يكتب : هذا ما يفعله كلاب "الكلوب هاوس" المقيمين بالخارج

خلونا ننزل على الشارع عشان نسقط النظام ،هذا نظام فاسد مش قادرين نطعمي اولادنا بسببه ، لازم نطلع عالشارع بمسيرة مليونية نوصل صوتنا للعالم أنه يا بتصلح يا بتروح ..

٦

هاض الحكي كل يوم قاعد بصير على تطبيق الكلوب هاوس ، من قبل كلاب الكليب هاوس الي مقيمين بالخارج ، الي الواحد فيهم مش معروف مين هو اصلا ، وكيف طلع ، وشو بده ، ولا شو الغاية تاعته ..

بالنسبة إلي مش قاعد بتقرب لحدا بكلامي هاض ، ومش مستعد اكتب اشي عشان حدا يرضى عني ، بس بالمقابل أنا من الناس الي برفض رفض قاطع ييجي واحد عايش برا ويقلي شو اسوي ولا شو اعمل ، برفض رفض كامل أنه الي طالع لجوء على أساس أنه مثلي الجنسية ولا عشان متعاطي مخدرات ويقلي اطلع وعلي صوتك..

رحت واجيت على اكثر من دولة ، فش دولة بتقدر ترفع فيها صوتك وتكتب بحرية زي الاردن ، بتنتقد بالسقف الي بتشوفه مناسب ،بشرط ما تتعدا على حرية غيرك ، وبلاد كثيرة جنبنا إذا بتنتقد فيها موظف بتنسجن ، وهون الوضع مختلف..

بحكولك بدنا يحاربوا الفساد ، أنا شخصيا قاعد بطلع مين الفاسدين الي عندنا والي لازم نحاكمهم ،بلاقي الوزير مش فاسد ولا رئيس الوزراء فاسد، بلاقي موظف بسيط هو الفاسد ،الي بعطلك معاملة عشان يوخذ عليها أو ما بمشيها ،بلاقي الي واقف عالباب هو الفاسد الي ما بدخلك عالمسؤول الا إذا أعطيته عشان تدخل ، وبلاقي رئيس القسم شاد على حاله ورافض أي معاملة تمشي الا عمزاجه ،ومدير المكتب هو الامر والناهي .. اذا مين الفاسد مهو ابن عمي وابن عمك وابن خالتي وخالتك ، الفساد بالاردن ما ببلش من الهرم بالعكس الي شايفه ببلش من أول درجة واطلع..

اليوم في أشخاص كانوا بشاركوا عبر هذا التطبيق وتم ضبطهم وإحالتهم على المحكمة بتهم عدة ،وفي غيرهم لسا جاري البحث عنهم..

الي بده أوصله ، أنه الوضع الاقتصادي صعب وعندنا أزمة بالادارة ، ومن حقنا نعيش ويكون في زيادة على الرواتب ، والسلع تكون ارخص ، والضرائب تكون أقل ، وعندنا مسؤولين حرام يكونوا على كراسيهم ، وما حدا عاقل بحكي غير هيك، بس الاهم أنه مهمها اختلفنا مع النظام أو مع القرارات الصادرة ، ما بدنا نوصل لمرحلة زي الي وصلوها دول كثيرة جنبنا ولسا بدفعوا ثمنها ، عشان أجندات ما راح تخدم حدا، بالعكس راح نكون ضحايا لا اكثر .. والله من وراء القصد

علاء الذيب