إيمان العكور تكتب : ليش يا بابا..؟ "ليش يا بابا؟

أنا غلا، عمري 8 شهور، وأخويا محمد، عمره 5 سنين. إحنا أطفال صغار، بريئين، ما منعرف شو صار بينك وبين ماما. ليش إحنا ندفع التمن؟ ليش يا بابا؟

كنا نحس إنك أمان، إنك السند، وإنك رح تحمينا من كل شي يخوفنا. كنا نتعلق فيك لما نمرض، لما نخاف، ولما نحتاج حد يطبطب علينا.

بس اليوم... اليوم كسرت كل شي.

اليوم أخدتنا بين إيديك، حسينا بالبرد بس ما خفنا، لأنه كنا بين إيديك. فكرنا إنك رح تاخدنا مكان فيه لعب وضحك... بس فجأة، شفت عيونك تغيرت. كنت تشوفنا وكأننا عبء عليك، وكأنه إحنا السبب.

ليش يا بابا؟..

ليش رميتني أنا وأخوي بالمي الباردة..؟ محمد كان يصرخ: "بابا لااااا!"

وأنا كنت ببكي. صوتي صغير يا دوب طالع ، يمكن ما وصل لك، أو يمكن سمعتني بس ما اهتميت. حسيت بالمية تلفني، بتغرقني، بتاخد مني روحي..بس حكيت مستحيل بابا يتركنا..

بس حسيت بعدها المي عم تخنقني وبطلت احس بشي..وفجأة صار سكوووت ..وما عدت اسمع او اشوف شي..

إحنا أطفال يا بابا... ما إلنا ذنب. شو سوينا علشان تستقوي علينا..؟ إحنا كنا حلمك لما انولدنا، كنت تشوف فينا مستقبلك... ليش صرت وحش يخوفنا بدل ما تحمينا؟

محمد كان يطلع عليك وهو يغرق، كان يتمنى إنك تمد إيدك وتسحبه، بس أنت وقفت تتفرج... بعيون ما فيها رحمة. يمكن كنت مبسوط وأنت بتشوفنا نموت..؟ يمكن كنت تقول "خليني أحرق قلب أمهم"... بس يا بابا، أنت حرقت قلوبنا إحنا، قتلتنا، وخليت أرواحنا تسألك إلى الأبد: "لييييش؟"

لو كنت زعلان من ماما، لو كان في بينكم مشاكل، إحنا مالنا..؟ إحنا أطفال، حلمنا نعيش ونلعب ونكبر.

ليش قررت بكل هالوحشية تقطع حلمنا؟

إحنا هلأ عند ربنا، عند اللي خلقنا ورحمنا منك. بس كلمتنا الأخيرة إلك يا بابا: الله رح يسألك عن دموعنا، عن صرخاتنا، وعن قلوبنا اللي وثقت فيك وغدرتها.

الله موجود، والعدل موجود. أما إحنا، فخلينا حلمك اللي دفنته بيديك..

ما راح نسامحك..

ماما… إحنا عارفين قلبك موجوع، عارفين دموعك ما بتوقف من لحظة ما عرفتي شو صار فينا. بس ماما، إحنا هلأ بمكان أحلى، مكان ما فيه خوف ولا وجع ولا صراخ ، وما فيه حد يرمينا أو يجرحنا.

ماما، إحنا عارفين إنك كنت تحبي تحمينا، وإنك كنتِ تضحكي معنا وتضميّنا لما نخاف. إحنا آسفين يا ماما، آسفين لأنك رح تكملي حياتك بدوننا. بس لا تخافي علينا، إحنا هلأ بين إيدين ربنا، ورح نبقى ندعي إلك تصبري وتكوني قوية.

ماما، خلي ذكرياتنا الحلوة تضوي قلبك، وخلي حبك إلنا يظل قوتك. إحنا معك يا ماما، حتى لو ما بنشوفك.

بنحبك يا أحن ماما بالدنيا...؟

رحمة الله عليهم.

طيور في الجنة

مش قادرة حتى الآن اتخيل كيف هانوا عليه أطفالها ورماهم بدم بارد في سيل الزرقاء ..؟؟

مجرم ..لازم يكون عقابه الإعدام