رسالة مؤثرة من زوجة الشهيد الصحفي “إسماعيل الغول”

تداول نشطاء عبر مواقع التواصل الاجتماعي رسالة مؤثرة كتبتها زوجـة "الشــهـيد الصحفي اسماعيل الغول” مراسل قناة الجزيرة بمدينة  غزة.

واستشهد الصحفي إسماعيل الغول مراسل قناة الجزيرة بمدينة غزة، والمصور الصحفي رامي الريفي إثر غارة إسرائيلية وقعت في مخيم الشاطئ غربي مدينة غزة.

ووقعت الغارة من قبل طائرة مسيرة إسرائيلية استهدفت الغول بعد إعداده تقرير مصور لقناة الجزيرة من أمام منزل إسماعيل هنية رئيس المكتب السياسي لحركة "حماس” والذي اغتيل فجرًا في طهران.

نص الرسالة زوجة الشهيد الصحفي إسماعيل الغول:

مقالات ذات صلة

"الجزيرة” ترد على إدعاءات الاحتلال بحق الزميل الصحفي الشهيد إسماعيل الغول

أغسطس 1, 2024

شاهد .. اللحظات الأولى بعد عملية اغتيال الزميل الصحفي إسماعيل الغول في مدينة غزة

يوليو 31, 2024

زوجـة "الشــهـيد الصحفي اسماعيل الغول” تكتـب:-

قلبي عليك زي النار يا نور عيني.. رحت مقهور وبحسرتك علينا، نفسك تشوفنا أنا وزينة، رحت وأنت بتحكي أنا تعبااان تعبان من غيركم مش عارف أعيش من غيرك أنتي وزينة النا 10 شهور بحسرتنا وبقهرنا وولا مرة تخيلت يجيني خبرك ولا مرة تخيلت حد يقلي إسماعيل استشــهـد! أنا كنت بستنى الحرب تخلص عشان نشوفك! أنا مكنتش بستنى هذه النهاية! أنا كنت بستنى أول لقاء بينك أنت وزينة مكنتش بستنى صورة جنازتك!

زينة تعلقت فيك كثيررر كل ما يرن الجوال بتحكي بااباااا

وينك ترد على بنتك! لحتى الآن بستنى باتصالك تحكيلي مشتاقلكم يا أم زينة يلا هانت عدها خلصت الحرب وبنشوفكم ع خير.. رحت بدري والله بدري كتير لسا ما شبعناش منك.. لسا زينة بدها أبوها وبدها حضنه

الحرب مش هتخلص الحرب بدأت من جديد

كنت دايما تحكيلي كل ما أشوف زوجات الشــهـداء بتيجي في بالي وبحزن عليكي، بحكي ملك ايش هتعمل! تعيطيش عليي لمن أموت خليكي قوية.. أنت عارف قديش متعلقة فيك وراكنة عليك بكل اشي وبحكيلك كل اشي.. ليش رحت وسبتنا !

يااا الله برّد قلوبنا وهوّن علينا

حتى وأنت بنص الموت بتفكر فينا وهمك علينا، قبل ما تستشهد بلحظة كنت أحكي معك! حكتلي تقلقيش عليي أنا كويس يااريت الحياة وقفت بهديك اللحظة

حياتنا وقفت من بعدك يا اسماعيل

إحنا فخورين فيك وبكل اشي عملته طول هالحرب.. أنت كنت بطل يا حبيبي

حسبنا الله ونعم الوكيل

ياارب انتقم لدمائنا وأزواجنا وأطفالنا