رئيس بلدية الرصيفة : "اللي بيوكل العصي مش مثل اللي بعدها"

نبأ الأردن -

نبأ الأردن- في بوح له عبر صفحته على الفيسبوك، سلط رئيس بلدية الرصيفة شادي الزيناتي الضوء على الكثير من القضايا التي تعاني منها البلدية، مثل العجز المالي وعدم تمكنها من القيام بالكثير من واجباتها لعدم سداد الاموال المستحقة لها سواء على المواطنين والتجار أو حتى على الحكومة.
وتالياً ما نشره الزيناتي:

وزعنا مي وإفطار بالشوارع؛ قالوا استعراض..
ما وزعنا قالوا ليش ما توزعوا؟

لفينا جولات على الأسواق قالوا؛ استعراض..
ما عملنا قالوا روحوا شوفوا الاسواق؟

نخالف؛ لا.. ما تخالف ليش ما تخالفوا؟

ضحكنا مع التجار قالوا؛ قلة هيبة..
ما اضحكنا قالوا شايف حاله ومتكبر!

شلنا البسطات، قالوا حرام قطعتوا رزقتهم..
خليناها.. اكيد طعمومكم وخايفين منهم!!

زفتنا الشوارع الترابية واعلنا للجميع بشفافية عن خطة العمل والموازنة المديونية والعطاءات السابقة والحالية والقادمة لسنة.. ما خلصنا نقد

ما أعلنا.. ليش ما تكونوا شفافين؟

دعمنا الرياضة والشباب والمرأة والحدائق.. قالوا الشوارع أولى..

ما دعمنا.. قالوا أولادنا بدهم ملاعب وحدائق ودعم للشباب!

ما عنا موازنات تعبيد كافية صرنا نرقع الشوارع..قالوا؛ الترقيع ما بيزبط بدنا زفتة..
ما عملنا قالوا الجور دمرت السيارات!!

بيقولوا وبنقول معهم؛ شوارع المدينة مدمرة، نعم صحيح، وبدها اقل شي ثلاثين مليون دينار.. وما معنا وبنشتغل حسب الإمكانيات المتاحة.. مو عاجب

يا عمي ما خربت بيوم وليلة الها سنين وبدها سنين، اصبروا،
لا دبر حالك!!

عنا دين وعجز بالملايين وبدنا من الناس ترخيص ومسقفات كمان ملايين.. ادفعوا طيب عشان نشتغل .. ما معنا!!

طيب كيف نشتغل ومن وين نجيب إذا انتو وحتى الحكومة فلوسنا إلى عندها مو دافعتهم النا… برضه دبر حالك!!

إذا ما اشتغلت بحارته وباب بيته؛ انت ما اشتغلت ولا عملت شي

إذا ما وظفته علما انه مش قرارك ولا بايدك والزمن والقانون تغير؛ بتصير عاطل

وبعدين..

يا عمي، هاي مدينتك وبلديتك اذا ما وقفت معها ما بتتطور ومافي شي اسمه هات بدون خذ، ما بيزبط!

والله ماهي شركة خاصة ولا مانعين خدمة متوفرة للناس عنهم بالعكس مصلحتنا نعمل كل شي واكثر مما بدكم..

إذا النفايات أكرمكم الله ما بتنحط بالحاويات وبتنحط بالشارع..

إذا الواحد عمل مطبخ جديد بيكب القديم كمان بالشارع..

إذا الواحد اشترى كنابايات أو فرشات بيكوم القديم برضه بالشارع..

إذا الواحد بيبني بيت بيوكل نص الشارع بالسور تبعه بتصير شطارة.. ولما تحكيله زيل الاعتداء؛ الله لا يحطك محلنا..

إذا الواحد فتح محل بيدفع كل شي الا الترخيص لأنه ينكسر منه وبينخرب بيته..

أن الله لا يغير ما بقوم حتى يغيروا ما بأنفسهم واحنا بالبلدية بنحاول نغير ونتغير؛ وبنشتغل كل القطاعات لإرضاء الجميع ثقافة ورياضة واجتماع وشباب وشوارع ولمبات ونفايات وشفافية وإصلاح مالي وإداري وكل هاد بده وقت وبده إمكانيات ورغم شح الإمكانيات المادية والعجز والدين الا انه شغالين طموحنا السماء..

كونوا معنا سند وكونوا مع مدينتكم سند واعطونا وقتنا والله رح يسهل الأمور؛ البناء صعب جدا والفساد والهدم بيصير بغمضة عين..

وبقول انه وضعنا مش قمرة وربيع وبدنا كثير وكثير وكثير الرصيفة وأهلها بيستاهلوا كل خير وكل ما هو جميل بس الصبر طيب..

اقسم بالله إلى بيوكل العصا مش مثل الي بيعدها وتقبل الله منا ومنكم صالح الأعمال ونسأل الله التوفيق والأجر والثواب