الخارجية تتابع تعرض أردنيين اثنين لانتهاكات عمل "لا إنسانية" في أنغولا

نبأ الأردن-وجه مجموعة من الشباب الاردنيين العاملين في انغولا "نداء عاجلا" للحكومة لإنقاذهم، من صاحب عمل يعاملهم بطريقة مهينة ويهدد حياتهم.

وقال احد الشباب عبر الفيسبوك انه هرب مع صديقه من العمل بسبب سوء معاملة صاحب العمل، لكن الأخير تعهّد بقتلهما وإرسالهما جثثا إلى الأردن.

فيما قال محمد الرقاد انه تواصل مع غرفة عمليات وزارة الخارجية وتبين انهم على اطلاع كامل بالتفاصيل. ومتابعين القضية. والخبر الايجابي قادم.

وتاليا نص ما كتبه الشاب حمزة:

نداء #عاجل إلى حكومة المملكة الاردنية الهاشمية

احنا مجموعة شباب محجوزين في أنغولا وصلنا هون للعمل في شركة لمدة ٣ سنوات، اشتغلنا لفترة ٣ شهور بس وهربنا انا وصديقي إلى الشوارع!

كانت الفترة القصيرة هاي كفيلة لتكون الأسوأ على الاطلاق خلال حياتي

صاحب العمل بضرب الموظفين والعمال في اي أداة موجودة أمامه و على أي مكان بجسده ما بهمه ولا في بقلبه أيّة رحمة،

بهين الموظفين في أقذر الكلمات وابشعها بغلط عليهم في عرضهم وشرفهم .. شخص مريض نفسي حابسنا في سكن مقرف مليان فئران وصراصير .. ببدأ عملنا من الساعة٦:٣٠ص بنرجع على السكن المقرف في أقل تقدير ٨ ليلا وبتسكر الباب بالمفتاح علينا .. حاجز جوازات السفر ، ما بمسكنا فلوس، راشي كل الدولة هون اي مشكلة أو شكوى بحلها برشوة، يا جماعة اقسم بالله بحرمنا الاكل والشرب بتحكم فينا بأشياء من العيب ذكرها

اقسم بالله ويمين أحاسب عليه حاجز رجل عمره ٥٥ عام من سبع سنوات بضربه كفوف.. وبتف عليه .. بدير عليه دهان وشحمة وبهينه وبغلط على أهله وعائلته لأسباب تافهة جدا لا تصدق لانه مزاجه مش رايق بس!

وبخلي شباب من جيل أولاده تضربه وتهينه وتضربه بالكندرة ( مش تعبير مجازي) يا جماعة

بعد ما هربنا من عنده وصلت تهديدات من طرفه لأهلي واخواني لتخريب شغلهم وتهديدهم بأذية أولادهم وعائلاتهم، وانه رح يبعثنا جثث للاردن!!

وبهدد فينا بتقديم كمبيالات الى الحكومة الاردنية وقعنا عليها انا وصديقي قبل السفر ( فهمنا انه بعملنا في انغولا رح نكون مسؤولين عن بضائع وهاي الورق تعامل فقط كسندات امانة) والآن بهددنا فيها..

ما رح اذكر الان أسم صاحب العمل ( طبعا أردني الجنسية ) وأسم شركته.

اليوم بصير النا عشرة أيام هاربين من عنده ومازال بدور علينا وبهدد فينا ومقدم رشاوي للشرطة لتبحث عنا .

ملاحظة : ما تم ذكره هو لا يتعدى 1% من الواقع.
ول رجعوا زمن العبيد ؟!!!!!!!
بتمنى توافق يا ادمن
الموضوع وصل لوزارة الخارجية لكن بدنا نعمل ضجة على الموضوع لكي تتسرع الإجراءات بتمنى ترفعو المنشور ولو بنقطه او بنشر الهاشتاج حياة الشباب في خطر الموت وشكراً الكم.