سامية المراشدة تكتب: هاظ اني من إربد.. وشملت والنية إربد

فرق بينهم شاسع وكبير، مش عارف انا ليش مؤلفين الاغاني الأردنية والملحنين والمطرب بالذات عمر العبداللات ليش مركزين على إثبات لهجة القروية الأردنية بطريقة غريبة، ترى يا جماعة شفنا اغنية كيف حالكي وش علامكي وتأثيرها على الجو العام من يومها ما شفنا يوم مسعد ،ونص أهل الجنوب زعلوا من الاسلوب، اليوم طلعت علينا اغنية" هاظ أني من إربد" ، نصيحة يا عمر العبداللات انت مطرب نعتز فيك لكن لما غنيت يا بنات بلادي لا تتغربن، ودعني قلت يوم ويرجعن يا عذاب قلبي يومن سافرن، عرفت توظف صوتك بطريقة أجمل، لما غنيت اغاني وطنية اعتبرناها سردية تراثية، من انك تغني كيف حالكي وهاظ اني من إربد بصراحة احنا مش عارفين نتأقلم معها أو احنا جهال معرفة الفن ، احنا ما بننكر لهجتنا، لكن قرب جاي بعدنا بنقول هاظ اني من إربد، وجيف حالك،وقرمز هون، وغزلنا حلو ومقطم، وشومالك بتلد علي ، وبنطبخ جعاجيل ونوكل جعج و بنقول ملجا بدل ملكا، وجعفيه وخرجا من قرآنا ، لكن عندنا كفركيكا وكفرلما والحصن الأبية تغيرن، الجيل الجديد بحكي مدني تقول ساكنين بعبدون، ولا ننسى اربد تربتهاتربه حمرا، على صعيد الشخصي، اني احيانا بحكي أني ومرات بقول أنا، ساعة بحكي مدني وساعة بحجي قروي، مش أغنية هاظ اني من إربد،تعبر عن واقع اربد كله وناسه ، المطلوب من عمر العبداللات مع احترامي إله، يعني على مستوى الوطن اغنية اردنية تمثل اسلوب واحد، ما توصل لإربد فقط لأنه اربد تشمل كل أرض حوران ومنها سوريا، كلها نفس اللهجة والكلام ، لكن هناك فرق بأنك تعمل اغنية أردنية شاملة بدون تمييز بلهجة المحافظات وللاردن كله ويسمعها للعالم كله...