نضال أنور المجالي يكتب: مين كان يعرف الأردن؟! .. عفوًا، شكلنا كنا شغالين "أوفلاين" وإحنا مش داريين!
نبأ الأردن -
في مثل قديم بيقول: "إذا خانك التعبير، لا تفرجينا عرض كتافك واللسان الطويل"! بس الجماعة عندنا، ما شاء الله، لما يقعدوا ورا المايكروفونات، بينسوا التاريخ والجغرافيا، وبتنزل عليهم "فلسفة" بتخلي الواحد مش عارف يضحك ولا يلطم!
لما تطلع شخصية "رسمية" أو محسوبة على الوعي، وبكل ثقة وهزّة راس، يرمي هالقنبلة: "هو مين كان يعرف الأردن؟!".. هون ودك تمسك راسك وتقول: يا جماعة الخير، حد يطفي النت عن الجماعة، أو يصحيهم بـ "شطفة مية باردة"!
يعني عفوًا يا جهبذ زمانك، الأردن قبل ما تشرّفنا بمعرفتك، شو كان بنظرك؟ جزر هاواي مثلاً؟ ولا كنا عايشين "أوفلاين" وتونا شبكنا على كوكب الأرض لما إنت تذكرتنا؟!
كتالوج تعريفي.. للي ضيع التاريخ في سوق الجمعة!
بما إنه الذاكرة عندك "صينية" وممسوحة، خلينا نذكرك على السريع (وببلاش بدون رسوم):
الأردن كان معروفاً يوم ما كانت الدبابة بتسولف عربي: يوم ما كانت أسوار القدس وباب الواد ترويها دماء عسكرنا، ويوم ما كانت معركة الكرامة بتكسر خشوم، إنت وين كنت؟ بتلعب "أتاري" ولا بتدور على إرسال؟!
خريطة الكرم مش بحاجة لـ "جي بي إس": الأردن معروف من يوم ما كان البيت بيت الملهوف، و"المهباش" بيطحن هيل ليل نهار ليرحب بالضيف والمستجير. إحنا دولة بنتها القيادة الهاشمية من الصفر بوسط قلاقل وحروب، وظلت واقفة مثل "وتد الخيمة"، مش ناطرة كرت زيارة من معاليك عشان تنعرف!
بلد الفوتيك والجباه السمر: الأردن معروف بـ "شماغ" مهدب بيسوى تاريخ بحاله، وبجيش برفع الرأس، مش بلد طلع امبارح على "التيك توك" وبيدور على "لايكات" وتفاعل!
سقطة بـ "خمس نجوم".. وشر البلية ما يضحك!
يا فلان، لما خانك التعبير، إنت ما هزيت هيبة البلد (لأنها صخر جلمود)، إنت بس كشفتلنا إنك محتاج "دورة محو أمية وطنية" مستعجلة! السخرية وين؟ إنه ناس بتفكر حالها "محور الكون"، وإذا هم ما كانوا عارفين البلد، يعني البلد مش موجودة!
العتب مش عليك، العتب على المايك اللي انفتح وعلى الكرسي اللي قعدت عليه وخلاك تشوف الدنيا من فوق "برج عاجي" مغبّش.
على الهامش وضمن العتاب المقلي بـ "سمن بلدي":
ترى الأردن اسم بيهز جبال، وتاريخه مكتوب بالدم والبارود، مش بـ "فشة غل" أو زلة لسان بـ "قعدة شاي". فـ يا ريت المرة الجاي قبل ما تسأل "مين كان يعرف الأردن؟"، افتح جوجل، أو اسأل أي حجر بقرى الكرك، أو اربد، أو الطفيلة، أو عجلون.. وهم بفهموك مين إحنا!
نصيحة أخيرة: إذا كان الكلام من فضة، فـ "السكوت" في حالتك.. بيوفر علينا جلطات!حفظ الله الاردن والهاشمين
تابعوا نبأ الأردن على
