د. نضال المجالي يكتب: ساعتين زمن بحضرة الملك

{title}
نبأ الأردن -
بصراحة حتى يكون الحكي قريب لازم أحكي بلغة بسيطة لمًا اعبر عن الاشي المهم.

ما رح ازاود بالفرح اللي عشته على اي اردني او حتى عربي محب لهالبلد، لاني متأكد الفرح في قلبنا واحد، ويمكن كنت بس مبسوط ومهتم بفرح الحسين الأمير الاجمل والأبهى زي كثيرين، وفرحي فرح عادي وطبيعي، لحتى حضرت الدعوة الملكية للعشاء بمضارب بني هاشم في رغدان العز، واختلفت حالة الفرح والانبساط بشكل غير، وعشت مع كثير من ابناء الاردن هيبة ملك وكلام اب ونصيحة قائد وفرحة شعب.

ساعتين زمن بحضرة الملك والعريس الأمير باحلى طلة، وسط هالاجواء اللي كلها قُرب وصلة، كلها فخر ونشوة، فيها مشاعر وقشعرة بدن بكل كلمة قالها سيدنا، سيدنا اللي كان معزب مختلف، معزبنا الملك وصل قبل العريس الأمير، يستقبل ويهلي بالضيوف واهل الدار الشعب الجميل، لف حوالينا ورفع ايديه رحب بكل واحد، وقبل هيك امراء ورجالات الملك استقبلوا وسلموا بالأيدي على كل ضيف، يعني قدر وهيبة وتقدير لضيوف الملك ضيوف مضارب الهواشم.

دبكنا وغنينا مع كل مطرب وقصيده، دندنا وهلينا مع كل معزوفه، وكلنا رفعنا رؤوسنا ووقفنا نتابع الملك بسلم سيف العز للأمير، وكلنا كنا نميل مع كل تزقيفه بايدين الملك والأمير، وكلنا عيونا ما رمشت بحضرة الملك والأمير، لانه ما كنا بدنا نضيّع ولو لحظة واحده من هالفرحة والقرب من الملك والعريس الأمير.

حتى والله المنسف نكهة وطعم غير، وزي اللي بنقوله دائما منسفنا الازكى بجمعة فرح، وكيف بالكم وهوه بدعوة ملك وفرحة الأمير ولي العهد، نعم وقف الملك وقال: "تفضلوا على العشاء" وهاي ابسط مظاهر الترحيب في اعراسنا وفيها صدق الفرح والتقدير للحاضرين.

مش عارف غير اقول انه هالايام هي الاجمل والأقرب بصراحة بالمستوى الشعبي الواسع اللي طول عمره مميز باهتمام بين الملك والملكة والأمير مع الشعب، لكن هالايام هاي والله غير وبتشعر انه كل اردني وكل محب للهاشمين عاش الفرح والعرس عرسهم، نعم تابعوا وعيدوا الايام الماضية واليوم كمان، واتفرجوا وشوفوا كل لقطة وفعالية رح تعرفوا انه الملك والملكة والأمير جعلوا كل اردني وكأنه ابن العيلة الهاشمية صح، وانهم شركاء البيت في الفرح، ولهيك بطلعلنا نقول بصوت عالي الملك ملكنا والعريس عريسنا.

عامره وبتضل عامره مضارب الهاشميين وبنقول سيدي حنا فداك وفداء الأمير والوطن بكل ذرات ترابه، وربنا يجعل الوطن عامر وعزه قوي دائما بقيادتكم سيدي.
تابعوا نبأ الأردن على