تفاصيل رد النابلسي "الحفيد" العنيف على سمير الرفاعي

تلقى رئيس الوزراء الاسبق سمير زيد الرفاعي ردا يعتبر هو الأعنف منذ بدء حواراته بعد تشكيل لجنة الاصلاح السياسي في الأردن.

الرد جاء من المحامي سليمان فارس النابلسي، وهو حفيد رئيس الحكومة الحزبية الوحيدة التي تشكلت في تاريخ الاردن عام 1956.

ويأتي الرد الذي ادرجه النابلسي الحفيد على صفحته بموقع الفيسبوك تعقيبا على تصريحات الرفاعي التي أطلقها خلال ندوة في مؤسسة شومان نهاية الشهر الماضي، والذي قال الرفاعي فيها ان حكومة النابلسي كانت تتلقى تعليمات من الخارج وفي عهدها جرت محاولة الانقلاب على النظام .

وقال النابلسي الحفيد في رده العنيف أن عهد حكومة الرفاعي الجد (سمير الرفاعي) انتهى بعدم الحصول على الثقة وعهد حكومات الرفاعي الأب (زيد سمير الرفاعي) انتهى بهبة شعبية بدأت في معان فيما انتهت حكومة الرفاعي الحفيد باستقالة حكومته وسط ضغط شعبي.

تاليا النص الكامل لما كتبه النابلسي :

الجد ١٢٨٤
الاب ٢٦٢٤
الابن ٤٠٢
المجموع ٤٣١٠
هذه ليست حصص بقوشان قطعه الارض بل عدد الايام التي قضاها ٣ اجيال من عائله واحده بمنصب رئيس الوزراء بالاردن
وانتهت خدمه كل منهم بقصه ( عدم الحصول على الثقه ، هبة شعبية بدأت بمعان و انتشرت بكل الاردن ، ربيع عربي اسقط عدة انظمه وعنا اكتفى بترويح حكومه يعني ترويح حكومه يساوي ترويح بن علي و قتل القذافي و خلع مبارك و اضطرابات مستمره في سوريا )
ما علينا لما ياتي الحفيد و بمؤسسة محترمه مثل مؤسسه شومان يحكي و يفتي انه حكومه جدي سليمان النابلسي (١٦٢) يوم كانت تخطط للانقلاب على النظام وتتلقى تعليمات الخارج هون صار مشكله
الحكومة الحزبية الوحيدة بتاريخ البلد ما كانت تخطط للانقلاب وارجع لكتب التاريخ اللي صدرت من ٢٠ سنة وجاي هاي ممكن تفهمك اللي صار فعلا
اللي بده يقلب النظام اللي قام الشعب بسبب تصرفاتة يثور بدة يخلص منة مرتين
اللي مجلس النواب ممثل الشعب قرر ما بدي اياك
يا زلمه اترك سليمان النابلسي والحكومة الوطنية على جال ما تبلش فيها
لما حكومة قعدت ١٦٢ يوم كل الناس بتقولك بدنا حكومة زيها او ياريت نوصل لطريق نقدر نشكل وحده بتشبهها و لما قعدتوا ٤٣١٠ ايام وما حدًا بترحم على ايامكم ولا حدا بقول بدنا حكومه زي حكومه جدك الاولى او ابوك الثالثه او حكومتك الثانيه
بهال ٤٣١٠ يوم ما حدا بيسترجي يحكي الله يعيد اسبوعين منهم والا نص الاردنيين بيحكوا عنه منافق وكذاب
يعني كل يوم قضاه جدي بالحكومه مقابله ٢٦ يوم لعائلتكم الكريمة ومع هيك لما تسال مين رئيس وزراء قد حالة بكون جدي على رأس القائمة
و بالنتيجة اذا جدي توفى قبل ٤٦ سنة و شكل الحكومة قبل ٦٦ سنة و لغاية الان مش قادرين تنسوة وبتحاولوا تطمسوا اللي صار معناه المشكلة عندكم مش عنده
و تذكرت بيت شعر بهالمناسبة
كم من رجل يعد بألف رجل وكم من ألف يمرون بلا عداد